سوالف أبو رضا

  ولها بقية

هاي سالفتنة مخصوصة للجماعة بمجلس الحكم .
سالفتنه - يغاتي - :-
واحد نذر فد نذر ، إذا صار عده ولد يذبح ذبيحة ،و ينطيهَ لواحد خالي كَلب، و بعد ما صار عده ولد ، أحتار وين يلكَه خالي كَلب حتى يطيه الذبيحة !! ظل صاحبنا يدور بالعربان و من سلف لسلف لمن فد يوم من الايام طب لمدينة من المدن و هو يعاين بيها شاف المدينة محتفلة ،و لمن سأل : هاي شكو بالمدينة اليوم ؟ جاوبوه اليوم تنصيب شيخ المدينة الجديد .
سألهم : وشيخكم القديم و ينه؟ شنو مات ؟
جاوبوه : لا ، ذاك وينه!!
عاين و لنه يشوف الشيخ القديم للمدينة - يغاتي - مركبينه على دابة و مزينين شعر راسه و الجهال حواليه ، هذا اليضربه و هذا اليشتم بيه !! تعجب صاحبنا من السالفة وراح للشيخ الجديد و سأله فجاوبه نفس السالفة !!ولمن سأله : زين هاي كل شكَد يتبدل شيخكم ؟ جاوبه الشيخ الجديد : كل سنة !
رد سأله صاحبنا : يعني سنة الاخرى هم يجيبون غيرك و يركبونك على الدابة و يدورون بيك بالولاية مثل الشيخ اللي قبلك ؟
جاوبه الشيخ : أي نعم !!
رد عليه صاحبنا : و انت تدري و موافق على هالشيخة ؟
هز راسه الشيخ و جاوبه : أي نعم !!
هنا صاحبنا نب عليه : خوي ، آنه ناذر نذر لواحد خالي كَلب ، و آنه صار لي فترة أدور عليك و ماكو أحسن منك خالي كَلب .
و شال النذر و انطاهياه .
سالفتنا ياخوتي -على مجلس الحكم هذوله هم خالين كَلب لنهم يدرون شصار بهدام قبلهم و ياهو الجابه و ياهو الطلعه من الحكم وركبه على الدابة و افتر بيه الولاية وهو نفس الجابهم و هم راح يطلعهم و يركبهم على الدابة و يفر بيهم الولاية و نريد إنبههم و نكَول شوية فكوا دماغكم ياخالين الكَلب !!