سوالف أبو رضا

  ولها بقية

يردون من عدنه نعالج الأمور بحكمة ، وواحدهم يكَول خلوها بالتفاهم ، وواحد يكَول لا نستعجل الامور خليهه لواحد تموز ، لمن يطيح الرطب ، وساعتها يطلع الاحتلال … ومن كل عقله يحجيها ، هذا إذا عده عقل ، بس نكول لا… يريد يصير خيّر براسنا .
وحجيهم مستمر وعله هالرنة طحينج ناعم !!
يردونا بس نستنكر ونشجب وآنه خالك !!
راح تسألني شنهي وآنه خالك ، و اكَلك مو بس هاي ، لا وآنه خوب مومنهه ودون !! وما رضيت وآنه خالك !!
وحتى لا تزعل مني و تروح خل اسولفلك سالفتنا لون بيهه رباط ويه حجاية واحد من الاجاويـد !!
يكول هالخير : خالي إجانه فرد يوم عيونه مورمة ووجهه ازركَ وهدومه مبهذلة .
سألت خالي : خير !! يا هو وياك !!
جاوبني خالي : اسكت تعاركت وي واحد جنه طنطل ولطمني بوكس وطيحني وآنه خالك !! كَمتله ، ولنك وياي ذيج الساعة لمن رد ضربني كله براسه ، او طحت …وآنه خالك !!وما اخليه هيج ورديت كَمت وماقصر هوه رد دفرني بدفرة على كَلبي وطحت وآنه خوب مو منهه ودون ورديت كَمت وآنه خالك !!
جاوبه ابن اخته : خالي ، كافي ، كافي ، اشو خالي شبع كفخات وانت كل شي ما تسوي بس تصيح وآنه خالك وكَمت وطيحني وآنه خالك ، جا ما تكَلي شوكت ترد عليه ؟هسه ولا سالفتنا عله ذوله جاشوكت تردون على الامريكان تظلون بس تنفخون احنة واحنة .
عمي المابيه زود خلّه يسكت و يكرمنه بسكوته وخلو اهلهه التعرفلهه ، وهيه تعرف شلون ترد عليهم ، وانتم ظلو يم نسوانكم تره هم بيه اجر و ثواب .

عمكم ابو رضه