سوالف أبو رضا

  ولها بقية

يكَولون " الحجّامين " ابغداد جانوا هواي وهذوله يداوون الناس بالحجّامة واللما يعرف شنهي الحجّامة انكله " لمن يطلعون الدم الفاسد من الجسم " وذولة الحجامين تصير عدهم بعض المرات تلوث بالجرح ولازم يطلعون دم من جديد ، واحسن طريقة عدهم يخلون المريض يصير عصبي كلش بسوالفهم الموزينه واللي تزعل اكبر واحد حتى يطلع الدم زايد ويطلع وياه التلوث ، بعدهه يسولفوله الصحيح ويصالحونه ويفهمونه السبب ويرضوه .
وفد يوم - يغاتي - راح الاسطة الحجّام بشغلة وخله الصانع بالمحل ، ليش ما اجه " أبو خضير " يحجّم وصار عنده تلوث بالجرح وصار العامل - حسب الاصول - يحجيله سوالف تزعل وتثير اعصاب كل واحد وتثير الغيرة بالراس ، بس " ابو خضير" ولا جنه واشما يسولفله العامل سوالف تمس الشرف والعرض ويغثه ما يفيد عبن صاحبنا عده دم عكروك بارد لا يزعل و لا تتحرك الغيرة براسه .
كَول اجه الاسطى شاف الموقف كَدامه ، كَال للعامل شنو القصة ابني ؟ كَله استادي هذا ولا تتحرك غيرته ابد ، سولفتله كل السوالف ولا جنه !!
كَله الاسطة بسيطة هاي خليهه على عمك .
ركض الاسطة وكَبل على مداس " ابو خضير " وكَصه بالسجين او سواه وصلتين ، بهاي الساعة صعدت الغيرة عد " ابو خضير " وهاج الدم الفاسد وطلع التلوث .
بعده رضوه وصالحوه وراح لبيته .
الاسطى كَال للعامل : ابني مو كل واحد غيرته براسه ، اكو ناس غيرتهه بمداسهه !!
شاهد احجايتنة هاي اكو ناس ما يهمهه اذا امريكا احتلت وحاصرت كربلا لو النجف لو الفلوجة لو غيرهه وما يهمه ضربة كَبة امير المؤمنين بس كون ما ينكَطع منه راتبه و لا يروح منه منصبه ولا ينكَطع مداسه !!
واخوتنا اهل الفوجة هالجابو للنجف تسع لوريات كلها اكل ودوه مساعدة لخوتهم الشيعة عبن الغيرة عدهم بالراس خوب مو مثل جماعة ابو خضير عدهم الغيرة بالمداس !!