سوالف أبو رضا

  ولها بقية

يكَولون فد يوم من الأيام شيخ دخل المكَبرة وإذا أيشوف فد شاب يبجي على كَبر بس بجي كلش قوي ، إجه وسلّم عليه ،وواساه وقراله فاتحة وسأله شيكون المرحوم منك ؟ جاوبه : هاي والدتي . لكن هذا الشاب لمن باوع على الشيخ كَام يبجي ويصرخ بصوت أقوى من كَبل .
سأله الشيخ : ها ابني شبيك ؟
جاوبه وكَلّه : المرحومة هم عورة مثلك !!
رد الشيخ : ابني هذا الإنسان واحد اعور أو واحد لا
رد الشاب يعاين على الشيخ ، وصرخ بصوت عالي وكَام يلطم !!
سأله الشيخ : ها ابني ، شكو ، إش خيرك ؟
جاوبه الشاب : شيخنه هم اليمنة !!
رد الشيخ : أي ابني هي عينين لو يمنه لو يسره !!
عاد الشاب باوع عليه وكَام يشيل تراب ويحط على راسه دنكَ عليه الشيخ وكَام يهديه وسأله : بويه تهده بالرحمن شبيك ؟
جاوبه الشاب وهو يبجي : هم بيهه بياض مثل عينك !!
عاد هنا صار الشيخ عصبي وكَله : لعنة الله على روح أمك اشو عفت أمك وجلبت بعيني العورة !!
هسه سالفتنا رباطها على ربعنا المحسوبين علينا شيعة ومثقفين،اشو عايفين الدنيه مكَلوبة ،الأمريكيين مخربين كل شي ومحتلين البلد والقتل يوميه بالعشرات، ولا ماي ولا كهرباء ، والناس ميتة من الجوع والعصابات تارسه الشوارع يعني مختصر مفيد دولة ميتة ، وهذولة مجلبين بسالفة وحده اسمها قضية عبد المجيد الخوئي ومو صوجهم صوج الليقره فاتحة على روح …..