سوالف أبو رضا

  ولها بقية

يكَول ( البوش ) راح أسوّي ديمقراطية بالعراق تتمناها كل أهل المنطقة ، يابه خوش ، أشلون ؟ كَال انتم ماعليكم .. آنه راح اوخر صدام منكم واخليكم انتم تحكمون نفسكم بنفسكم .. ولا موبس هاي اخلّي جيرانكم يتمنون ايصيرون مثلكم ، وتالي ماتالي ، جنهه مثل عرفة أم عامر !!! هسه راح تكَلي بالله أشلون سالفة أم عامر ؟ اكَلك هيه السالفه مسموعة ومو جديده لاجن يكولون بالاعاده إفاده …هاي ام عامر عريّفه مال كَومهه كل مايصير عدهم فد شي يشيرونهه ، فد يوم من الأيام اجه ثور مكرم القاري يشرب ماي من (الحِب) ، تعرف شنو (الحِب)؟؟ أها .. رحمة الله على والديك من عرفت ( الحِب) ، يعني حبّانه اللي يخلون بيهه ماي . ليش ماعصه راس الثور بالحِب ، ويردون يطلعونه ما يكَدرون .. وما يريدون يكسرون الحِب .. ويريدون الثور يطلع سالم ، كَول أجو لأم عامر كَالولهه : عمّه هذا الثور عصه راسه بالحب ونريد انطلعه ما يطلع ، كَالتلهم سهله ، صدك جذب .. هاي ماتعرفولهه ، اذبحوا الثور !! لكن من ذبحوا الثور ،كَلولهه : هم ماطلع الراس !! كَالت الهم جا أكسروا الحِب ، كسروا الحِب .. كَالولهه هسه الحصلناه شنو ؟؟ أشو ذبحنه الثور وكسرنه الحِب .. ياهو اللي حصلناه ، هسه ولا ســالفتنه ، أشو لا ديمقراطية ولا أمان ولا كهرباء ولا ماي ولا (الحِب) ولا (الثــور) ، شنو اللي حصلناه ؟؟ يا أم عامر .

عمكم ابو رضه