سوالف أبو رضا

  ولها بقية

ايكَولون فد والي من الولاة اخبروه عن قاضي من القضاة كَالوا له هذا القاضي أشو يعضّ المتهم كَبل ما يصدر الحكم عليه كَاللهم الوالي ، اشلون القاضي يعضّ المتهم .. ما صايرة هاي ، كَالوله مثل ماانكَلك .. ويعضّه من اذنه ، لبس الوالي اهدوم عادية وتلثم وراح للمحكمة وكَعد وي الناس اليستمعون للمحاكمة :
جابوا واحد مطلوب افلوس لواحد ، كَال القاضي : هذا الرجل يطلبك عشرين ليرة ذهب.
كَال المتهم : نعم سيادة القاضي كَال القاضي :اشكَد صارلهن الفلوس ، كَال المتهم : اهواي صارلهن سيادة القاضي .
كَال القاضي : ليش ماتنطيه افلوسه ، جاوب المتهم : سيادة القاضي آنه رجّال على باب الله اوماعدّي راتب بيوم معين من يجيني على الفلوس يلكَه ذاك اليوم ماعندي فلوس ، من يصير عندي افلوس أدور عليه ماالكَاه .. وراهه اصرفهن يجيني يلكَاني صارفهن .
كَاله القاضي : واشلون الحل .. اتوفيه لوما توفيه ، كَاله : سيادة القاضي آنه عندي الحل ، كَال القاضي شنو الحل ( الوالي يسمع هذا الحجي) ، كَال المتهم : الحل سيادة القاضي تحبسون صاحب الفلوس عدكم شهر، شهرين، ثلاث حتى آنه من اتصير عندي الفلوس أجي أنطيها اله حتى مااظل ادور عليه وهم هو ايحصل افلوسه ، كَام القاضي ايريد ايعض المتهم ، الوالي فك اللثام ماله اوكَام كَال للقاضي عوفه الي آنه أعضه او كَام او عضّه من اذانه ابمكان القاضي .
هسه ولاهدام بعده على سوالفه الغبر القديمة هاي او مايرادلهه محاكمة .. هذا اتعضه من لوزته واتخلص العباد والبلاد منه حتى لو عنده واسطة من امريكا !!!

عمكم ابو رضه