سوالف أبو رضا

  ولها بقية

اليوم عد عمكم أبو رضه ضيف وسالفة الضيف مقدمه على أبو البيت .
يكَول عمكم حجي محمد جعفر عبد الرماحي وهو من اهلنا ومن مصلي جامع الكوفة المعظم ،يكَول أيام زمان جانت العوائل كسبها ضعيف ومساحة البيوت ضيقة ويسكنون بالبيت اكثر من ثلاثة عوائل وبالصيف يسوون " الكله " وهي قماش ململ خفيف وتنام كل عائلة تحت الكلة متقاربين لأن سطح الدار ما يوسعهم .
وسالفتنا على مره زوجت ابنها وبتها بدارها وهم ينامون كلمن داخل الكلة العايده أله ، الأم ليليه توكَف يم بتها وتكَللها : بتي كَربي من رجلج ودفيه تره الوقت شتا والدنيه بارده واحنه بشهر كانون .
ثم تنتقل يم كلة ابنها وتكَله : يمه أبعد عن مرتك ، تره الدنيه حارة واحنه بتموز وأخاف عليك تمرض .
وظلت مرة ابنها تسمع هالحجي الخبيث من عمتها كل ليلة وهي ساكته ومستحية لحد ما طكَت روحها وخلص صبرها وجان تمد راسها من الكلة ونشرت شعرها ورفعت ايديها للسماء وكَالت :
يا رب يا قدير يا لطيف
بسطح واحد شته وصيف !!!
هسه عاد سالفتنا على اذاعة الغدير بالنجف ، مراسلهم جان يحضر صلاة الجمعة بالنجف وما يحضر بصلاة الجمعة بالكوفة !!الظاهر بالنجف شته وبالكــــــوفة صيف وحارة وانجمع صيف وشته بمدينة وحده .
واريد يغاتي اسأل اهل الاذاعة عن حديث رسول الله ص اللي يوصف المسلمين سواسية كأسنان المشط ، ليش ما يطبقونه لو المشط تغير من صار نايلون صارت اسنانه مختلفة مو مثل مشط الخشب كلهن متساويات .

عمكم ابو رضه