سوالف أبو رضا

  ولها بقية

اليوم سالفتنة تختلف عن خواتها ،تكَلي شلون ، ها أصبر وشوف .
سالفتنا يغاتي من يومين أجاني ابن عمي خلف و وجهه اصفر ومهموم ويصيح الحكَلي ابو رضا آنه داخل عدك تحلي هالمشكلة .
كَتله :عد عيناك كَول وآمر !!
كَلي : السيد القائد ظبنه فرد ظبه وكَال المايصلي صلاة الليل تره مو من عدنا او مو من الصدريين وآنه يخوك ما أعرف أصليها وما مرة مصليها واستحي أسأل واحد غيرك !!
كَتله خويه هاي سهلة وتره السيد القائد يريد مصلحتنا بالآخرة لأن هو شطاب بجيسه ، بس شلعان الكَلب ودوخة الراس ، المهم شوف صلاة الليل اهداعش ركعة .
اول ركعتين تقره باول ركعة منهه الحمد ، وقل يا ايها الكافرون وثاني ركعة الحمد وقل هو او أي سورة ثانية تريد .
ثاني ركعتين وثالث ركعتين ورابع ركعتين تقره مثل صلاة الصبح ما كو فرق الحمد وقل هو لو أي سورة ثانية .
قاطعني خلف وكَال : يعني صارن ثمانية اربع مرات كل وحدة اثنين مثل صلاة الصبح بس اول ركعتين بيهه قل يا ايها الكافرون .
جاوبته : أي خوية صحيح . وبعدين تنوي صلاة الشفع وهيه هم ركعتين مثل الصبح الاولى تقره الحمد وقل اعوذ برب الناس والثانية الحمد وقل اعوذ برب الفلق وتقنت بدعاء مال امامنا الكاظم ع او تقره غيره .
خلف شافهه سهله وكَال : خويه ذني كلهن سهلات جا شبينه ما نعرفلهه وكل صعوبة ما بيهه؟
كَتله خوية بقت بس ركعة وحدة الوتر .
خلف : عمي شنهي وحدة دكَول ازود هم حاضرين .
كَتله : أصبر شويه هاي الوحدة تقره بيهه الحمد وثلث مرات قل هو وتقره قل اعوذ برب الناس وقل اعوذ برب الفلق وبعدين ترفع ايدك بالقنوت وتكَول هذا مقام العائذ بك من النار سبع مرات وراهه تكَول استغفر الله واتوب اليه سبعين مرة وتستغفر لأربعين مؤمن وما تنسى اخوك السيد القائد وما تنساني وبعدهه ..
خلف تفاجأ وكَال : جا شنهي بعدهه ؟
كَتله : بسيطة تكَول العفو ثلثمية مرة .
خلف انتبه وكَال : عبنه السيد يكَول المايسويه مو من عدنا عمي هاي ما يكَدرلهه بس الصدريين .