سوالف أبو رضا

  ولها بقية

عدنه مثل قديم ايكَولون لو دامت لغيرك ما وصلت الك عله هذا الكَول ما يطبقه عله روحه إلا الفاهم كلش من حيث يعرف انهه ما أتدوم اله فيتصرف اعلا كيفه والعاقل أيفسر ما يحتاج انفسرله.ايكَولون اكو صاحب بستان عنده فلاح فد يوم اجاه كَاله عمي هذا العنب اللي عنده يجي العصفور يوميه اوياكل العنب كَاله صاحب البستان خليه كل امسلط عليه امسلط يعني اتركه هسه الله سبحانه وتعالى ايسلط عليه الاقوى منه، فد يوم ويشوف الفلاح العصفور بحلكَـ الحية عاضته وهو اينوص اجه الفلاح لصاحب البستان كَاله عمي شفت العصفور بحلكَـ الحية اكلته كَاله ابني كل امسلط عليه امسلط ،وفد يوم يغاتي ويشوف الكَنفذ كامش الحية من ذيلها اوياكل بيهه اشويه اشويه الى أن وصل للراس اجه الفلاح الى عمه صاحب البستان كَاله عمي الكَنفذ لزم الحية من ذيلها وكَام ياكل بيهه شوية شوية الى ان وصل للراس كَاله ابني مو كَتلك كل امسلط عليه امسلط.
هسه ما اطولك السالفة احنه انخاف عليكم او هذا الكَنفذ خاف ايكضكم من ذيلكم او لما يوصل للراس او بعدني تذكرون كلامي هذا تره كل امسلط عليه امسلط وانه وصيتكم من ذاك الاسبوع اوكَلت عاينو ليكَدام لا تعاينون ليوره تره اطيحون ،اطيحون وهسه هم اكَلكم شي بعد لو دامت الغيرك ما وصلت الك .