سوالف أبو رضا

  ولها بقية

يكَولون اليدري يدري والمايدري كَبضة عدس ، وهذا المثل ينضرب للي اموره تعبانه وبيته منهوب وهو نايم ورجليه بالشمس وما نكَدر نشرح سالفة العدس لنهه شوية - الكَاع محظورة - لكن إذا ما انتبه " شاويس " النايب مال وزارتنا راح نضطر بالمرة الجاية نشرحلهيا وعيبهه عليه ، ورباط سالفتنا على هذا المسؤول العراقي لمن جان تسأله المذيعة عن أحوال البلد ظل يتهجم عل التيار الصدري وعلى جيش الامام ع وسوه روحه كلشي يفتهم ومتابع وماكو مثله داعية سلام ولمن سألته علفلوجة والقصف البارحة واليوم وليش انكتلت الناس مادام اكو سلام صفن " شاويس " وكَلله والله ما سامع وما ادري !!
والاضبط منه صاحبنا علاوي يسولف ويه المذيع ويكَله كَبل ما أجيك شفت بقناة العربية ذوله الذبحوهم 12 واحد مادري من يا بلد يمكن بورما !! جاوبه المذيع وكَله لا ذوله من النيبال !!
هسه شاويس ما يدري بقصف الفلوجة والريّس توه سمع بذوله المساكين الصارلهم اسبوعين مخطوفين بالعراق وانذبحوا علخالي بلاش وما يدري ريسنا من يا بلد !!والبركة بالقنوات الفضائية وبالصحف تسولفلهم الاخبار حتى لو بايته وصحيح لو كَالو اليدري يدري والمايدري حنطته تاكل شعيره