سوالف أبو رضا

  ولها بقية

آم حسن عراقية تبيع خضرة بسوكَ الحي ، صار اسنين من طلعت للشغل بعد ما انكتل رجلها بالعسكرية ، الله يرحمه أبو حسن جان حالته فقيرة وماعاف لعياله بس التقاعد ومو عجيبة كل ربعنا هاي حالتهم .
بس أم حسن خوش مرة وسباعية ، ومن بيع الخضرة ربت ولدها ودخلتهم مدارس وعلمتهم وخلت عدهم شهادات زينة .
وما قصرت وياهم لا بأكل ولا لبس ولا مصرف الدراسة .
وابنهه الجبير " حسن " صار موظف جبير بالدولة قبل سنة ويقبض راتب ،وكبل شهر شال حسن هو ومرته من بيت أمه وبنى بيت جبير بالمنطقة وصارت عنده سيارات وحماية .
بس أم حسن بعدهي تبيع خضرة بسوك الحي وبعدها تغبش للعلوة تركب سيارة الجيب وعباتها ملحة تجيب الحاجة الزينة لمعاميلها اللي يحترمونها ويحترمون كبر سنها .
وحسن لاهي عن أمه وعن اخوته بس من يصير فصل لو كعدة عشاير لو عزايم يلبس العباه الزينة ويتصدر الديوان ويتمنطق تمنطق .
سالفتنه وانا عمكم على نواب البرلمان الله يحفظهم ولا يزعلون علي وانا عمهم !!
جا بوية شو واحدكم ما صار اله سنة واشترى بيت جبير الله يعمر بيوتكم ويكبرها وبعدهه مدينتكم خرابة !!
الله يحفظكم ويحفظ بيوتكم ويعلي مراتبكم مو الاصول تتعلمون من علي بن ابي طالب ع !!
عمي يا البرلمانيين عمروا بيوت الناس وشوارعها واسواقها ومدارسها كبل ما تعمرون بيوتكم !
جا مو خطية ام حسن ؟
مو خطية مدينتكم امكم اللي ربتكم وتعبت عليكم ووصلتكم !
ها بوية زعلتوا !!
الله يستر !!