سوالف أبو رضا

  ولها بقية

أبو المثل يكول ركبته وراي عل الفرس مد ايده بالخرج !!
وهذا المثل يمكن ما سامعين بيه الشباب اليوم لان راح وكت الحصان واجه وكت الاوبل والفكترة وما يعرفون شنو الخرج لان صار عدهم جنط !!
وسالفة المثل تنضرب على الخاين والغدار !!
وسالفتنه اليوم على النايب سامي العسكري !!
اللي طلعلنه اول ايام الانتخابات مال الجمعية ويه غايمة الجوادر والنخب بمدينة الصدر!!
وطبعا صعد لان هواي من ولدنا الصدريين انتخبوه وملطخوا اصابعهم بالحبر وسووه نايب !!
وظل بالمجلس بعد الانتخابات الثانية هم نايب !!
وطبعا هم الصدريين صعدوه لان هو ويه غايمة 555 !!
وذيج الايام جان يفتر بين الصدريين يصلي جمعة وياهم بالسدر ،يحضر فواتحهم ما يخلي عرس ما يروحله تكول واحد من ولدنا حتى قاط جان ما يلبس بدشداشته يفتر !!
وطبعا النايب دوم يطلع بالتلفزيون ويخطب بالناس وجنه نترجى يذكر الطيب ويذكر اهله بس هذا النايب - مع كل الاسف - دوم يخوط بصف الجدر !!
مرة يكول الامريكان ما لازم يطلعون خاف تصير حرب بين العراقيين ومرة يتلوك للحكومة عباله يسوونه وزير وبكل عزه تشوفه يلطم ويه الحكومة عل الهريسة !!
جا مو الاصول النايب يحجي مثل المنتخبينه وازود !!
لو هي لعبة وغلب !!
واللي يلعب ويه العراقيين ويخونهم تره كلشي ما يفتهم ، لان الدنيه دولاب وما لازم ينغر بيهه .
وتره مثل ما ركبوه على الفرس يكدرون ينزلونه !!