سوالف أبو رضا

  ولها بقية

سوالف ابو رضا

كلا كلا مونيكا

منو بينه ما يكره الاحتلال ويتمنى اليوم اللي نطردهم بيه من وطنه وانه عمكم اتمنى الشعب دوم يطلع مظاهرات ضد الاحتلال .
وفد يوم طالع ويه اهلنا بمدينة الصدر مظاهرة كلش جبيرة كولتهم مليونية وظلينه نهتف ونهوس ضد الاحتلال ونصيح :
كلا كلا امريكا .
بس واحد من ولدنا المثقفين جان يهتف غير شكل بس نفس الذبه جان يصيح: كلا كلا مونيكا !!
كتله عمي شمال عدوك تغير الهوسة صيح مثلنه : كلا كلا امريكا .
لكن ماكو فايدة ظل مقتنع برأيه وكال عمي شنو انته ما عايش بها الدنيه ؟ ما تسمع ماكو سالفه بيهه جريمة الا والمجرمين راكبين مونيكه ، التسليب الهم والقتل الهم والخطف الهم وعلا صوته وظل يهوس كلا كلا مونيكا !!
وطبعا هو مثقف ومو بلاش هاي هوسته جان يريد الناس ترفض الجرايم اللي تسويهه العصابات – وطبعا سياراتهم كلهه نوع مونيكا – وجان يريد الناس تتبره من اهل المونيكا .
وطبعا المصايب من تكثر الناس تنطي وصف مثل كبل جنه نكول المجرم لابس زيتوني وطبعا الزيتوني قماش ما ينحزر صاحبه من جماعة صديم لو يشتغل قطاع خاص بس المونيكا سيارات والهن رقم وعددهن عند الحكومة معروف لان هي استوردتهن وما ينعقل الدولة ما تدري ذني المصايب المن ؟
عمي يا المرور يا خطة فرض القانون يا بعد بيتي ليش الملاجه مال المونيكات ما تعرفوههم لو كلمن يداري خبيزته ؟